Fl-Għid tal-Assunta 15 – V111 – 2013

Minn kull rokna ta’ gżiritna

tiġi n-nies fil-Katidral

hekk kif jidħol magħna Awwissu –

żgħażagħ, xjuħ, miżżewġa, tfal!

Is-sajf ikun fl-aqwa tiegħu,

l-emigranti bdew ġejjin

sabiex f’nofs dax-xahar igawdu

l-Assunta, Omm il-bnedmin.

Li fil-għar ċkejken ta’ Betlem

għan-nifs sħun ta’ baqra w ħmar

lil binha welldet f’maxtura

bl-anġli dlonk jagħtu l-aħbar

Li kien twieled l-Iben t’Alla

biex jifdina u jsalvana,

bieb il-Ġenna fis jiftħilna

mix-xitan ħielsa jarana.

Beltna xxidd l-ilbies tal-festa

biex issellem lil Marija;

baned, ferħ, tlielaq tal-bhejjem,

mixegħla, musketterija.

U ġewwa l-Knisja Matriċi,

tiżjin, dwal, funzjonijiet,

statwa li tonqosha l-kelma,

Għaġeb tal-għeġubijiet!

Li l-Ħamis fl-għaxija toħroġ

b’idejha sewwa imberrħin

sabiex hienja ġo dirgħajha

tħaddan lilna il-Għawdxin.

Niftakar lil Dun Tarċisju,

lill-għażiża ommi Lola –

Int għalihom kont il-ġawhra,

jew tal-ġonna l-isbaħ vjola!

Hekk kif tkun iddur mat-toroq

merfugħa fuq l-ispallejn,

ixħet ħarstek fuq il-morda,

ixxuttalhom il-ħaddejn

Mid-dmugħ illi jnikkithom

fuq is-sodda tal-mard tagħhom;

‘tihom il-fejqan, il-faraġ,

u urihom l’inti magħhom!

U lis-Soċjeta’ Leone

li tagħmel kollox għalik,

kompli saħħaħ, orbot, irfed,

biex foħrija żżid ittik.

Inti kont illi fil-Gwerra

bgħattilna konvoj prezzjuż

illi refagħna minn xagħarna

b’munizzjon hekk delizzjuż.

Li mill-ġdid tana l-forza

biex inħarsu ‘l quddiem

u lill-għadu nqaċċtu ‘l barra

li għakkisna għal tant żmien.

Issa f’dan is-seklu tagħna

la tiqafx tidħol għalina;

Inti l-mimmi ta’ għajnejna

Int l-Assunta, Omm ħanina!

Min ħadimlek il-bradella

kien missieri l-mastrudaxxa;

jiena ibnu, hawn qudddiemek,

irrid bik dejjem nitpaxxa.

U meta ż-żmien jagħlaqli

‘tini l-grazzja niġi ħdejk;

sakemm iżda għadni hawn isfel

bla dewmien berraħli jdejk!

Kav Joe M Attard

Victoria Għawdex

Awwissu 2013